Aki Serian tetap menang: Minos

Riot besabat tangan enggau siku ketuai kimpin ia, Dr Simon Sindang (kanan). Jauh di belakang ia ADUN Kedup Martin Ben.
Riot besabat tangan enggau siku ketuai kimpin ia, Dr Simon Sindang (kanan). Jauh di belakang ia ADUN Kedup Martin Ben.

SERIAN: Ngeluie ari urang Serian, urang di luar kawasan luba enda nyangka Menteri Sumber Manusia Datuk Seri Dr Richard Riot Jaem bediri ngenan kerusi ia ba G14 tegal umur.

Tang ba rayat Serian, nadai ngelebih Riot, siti nama ti chukup tebilang lalu dikangau sida 'Aki'. Sida tetap ka nirika ia nyadi calun di Serian, sitak ti temegah ketegal ngembuan raja buah rian.

Serian mega nempa nama laban berani engkani batu jelu rimau enggau kerbau taja pin menuanya ukai menua sida.

Bala temuai jarang enda nanya, nama kebuah dua macham jelu tu tau bisi tempat di Serian. Saut ia, tu meh tanda menua bisi pengeraja, bisi pesaka ti tebilang nama.

Enti sema perintah tempatan tauka opis lukul ka nambah tanda pengeraja menua ngambika kena ngingat nama mensia tebilang, nadai ngelebih nama Riot laban ia siku pemimpin ti amat amat dikerindu mensia mayuh.

Serian menua Bidayuh, lalu Riot ketuai Bidayuh ti nadai saing dalam politik, ukai semina di Serian tang di Sarawak serta mega di Malaysia.

Ia udah jadi MP enam penggal lalu pertama kali anak Bidayuh nyadi menteri penuh di Putrajaya sepemanjai umur Malaysia.

Dalam kalangan urang Bidayuh luba urang ngangau ia 'Babuk' ti dalam jaku Iban, 'Aki'. Ia dikangau aki laban urang janggal nyebut nama laban ti bebasaka ia.

Ketegal basa urang ka ia, Riot tetap menang dalam PRU14, pia ku Datuk Peter Minos, siku ketuai bansa Bidayuh ti meratika jalai politik menua Sarawak, lebih agi politik urang Bidayuh.

"Nadai urang Serian enda ngelala Riot. Sampaika anak mit pin ngelala ia, lalu sida ngangau ia aki," ku Minos.

"Mensia tu chukup nelap, manah mua mata serta bebasa ka semua urang, nya alai dalam hal bepilih, nadai jalai ia tau alah.

"Dalam peragam aku, enti salah salah, calun penyakal engka lenyau duit jengkeram sekalitu.

"Sida ukai lawan ia. Sida nadai jasa ba rayat, nadai mentas, nadai sebati ba ati rayat. Riot tetap menang," ku Minos.

Minos mega madah dalam PRU13, semina Riot aja menang ari BN-SUPP. Semua calun bukai alah magang.

"Dia kita meda, ketuai siku tu ukai semina bisi kelebihan ari urang bukai tang ia sigi peturun antu, peturun raja, peturun gemala. Orang ka bisi nasit di jari Petara.

"Enti nuan bisi utai bakatu nya meh nuan nyulut agi ari urang bukai. Tu meh Riot," ku Minos.

Dalam PRU14, Riot besatup enggau Edward Luak ari DAP enggau Senior William Rade ari Independent.

"Nambah utai ke udah disebut aku tadi, Riot mega besedaduka ADUN Kedup Martin Ben enggau ADUN Bukit Semuja John Ilus. Kelimpah arinya, ia mega ditulung urang kuat ADUN Tebedu Datuk Seri Michael Manyin, ianya Penghulu Dennis Gamin enggau sekeda nembiak Bidayuh rebak baru baka Prof Madya Dr Novel Lyndon.

"Penyakal nadai setanding enggau BN di Serian. Serian tu Riot. Riot tu Serian. Serian enggau Riot nadai ulih dipisah. Aku gerenti, Riot menang pagila," ku Minos.