Kimpin meh chara manah, ku Riot

Riot (kanan) ngulu lebih 1,000 tukang kimpin ia belagu lagu BN
Riot (kanan) ngulu lebih 1,000 tukang kimpin ia belagu lagu BN

Calun BN bagi sitak P199 Serian Datuk Seri Richard Riot Jaem sehari tu meri jaku lalau ngagai bala ti kimpin ka ia anang bejai ka batang tubuh enggau pengidup calun parti pemangkang.

Bejaku ba moa enda kurang ari 1,000 bala ti kimpin ke ia dalam PRU14 di Bilik Gerakan BN P199 Serian di Kampung Pichin ngalih ari tadi, ia madahka ngelama ia nyadi pengari sitak Serian ari taun 1990, ia enda kala bejaika calun lawan chara peribadi.

Riot kimpin 2.jpeg
Bisi seribu ahli BN datai ngatur strategy kimpin ba Dewan Sri Riot di Kampung Pichin ngalih ari tadi.

 

Ku ia, laya politik ukai laya peribadi tang laya pahaman politik.

"Nya meh kebuah aku sigi madah DAP parti urang Malaya, ukai parti menoa Sarawak, nadai kebuah kitai urang Sarawak rindu amai berumah ba rumah urang dalam kitai bisi rumah kitai empu.

"Parti PBB, PRS, PDP enggau SUPP sigi ada dalam menoa Sarawak, betuaika anak Sarawak. Tu meh parti kitai. Dini dini calun parti empat macham tu bediri, undi meh ulih kitai. Anang peduli ka PKR enggau DAP. Parti tu enggau PAS bela parti urang Malaya," ku Riot ti mega Menteri Sumber Manusia Malaysia.

Dalam PRU14 tu, Riot besatup enggau calun DAP Edward Luak enggau independent Senior Rade.

Kemari maya nganjung nama, Riot bearak sekilometre enggau bala penyukung ia ti dianggar semak 4,000.

Sama enggau Riot kemari, penchadang ia Adun Kedup Martin Ben, seconder Adun Bukit Semuja John Ilus serta mega mantan Adun lima penggal Datuk Federick Bayoi Manggie.

Edward datai nganjung nama bebai enggau 70 penyukung.

Mayuh urang enda nyangka Senior ka betanding. Ia datai pin nyelit diri sebelah penyukung BN ti bearak.

Udah ia enggau 12 iku penyukung ia dipeda begumpul enda jauh ari pagar tempat nganjung nama, baru urang sedar Senior pin datai nganjung nama.