Riot nerima gelar professor Swansea University (UK)

Riot nerima surat professorship ia ari Prof Davies (kanan).
Riot nerima surat professorship ia ari Prof Davies (kanan).

SERIAN: Calun BN di P199 Serian diatu udah mai gelar Professor Datuk Seri (Dr) Richard Riot Jaem bekau ia ti nerima dokumen madu ia jadi professor kemari 1 Mei.

Udah lepas Menteri Sumber Manusia tu ngulu pengerami Hari Pekerja di PWTC di Kuala Lumpur sepiak pagi kemari, Riot nerima temuai ari Swansea University di United Kingdom ti datai mai setipiket, gaun enggau tupi segi empat kena ngelala ia ti udah nyadi professor ba universiti nya.

Bala temuai ti datai nya Vice Chancellor Swansea University Prof Richard Davies enggau Prof Marc Clement, Dean School of Management, Swansea University.

Sida datai lalu masuk ka gaun enggau tupi ba Riot serta nyua dokumen ngagai ia sambil diperati bala pegawai tinggi Kementerian Sumber Manusia (MoHR).

Prof Davies di Kuala Lumpur nuju aum sedunya 'Going Global 2018' 2-4 Mei ba Kuala Lumpur Convention Centre.

Kemari Prof Davies nyimbat nyampai dokumen professorship nya laban ke udah disetuju Swansea University Senate.

Bejaku enggau bala pembrita, Riot madahka gelar tu ukai semina kena ngipak chara kerja enggau tanggungjawab dalam kerja tang mega awakka nyadi peransang ka rebak baru.

Ku ia mega: "Lebih agi, tu ukai pengulih aku siku aja tang pengulih aku enggau rayat di sitak pegai aku di Serian."

Dalam PRU14 tu, Riot bediri kali ka tujuh di Serian besatup enggau Edward Luak ari DAP enggau Senior Rade (Independent).

Rata rata pemerati politik melebaka Riot ka menang enggau majoriti besai dalam bepilih besai sekalitu belandarka rekod kerja ti manah serta chara gaul enggau rayat ti nadai alai nyalah.