Veteran politik jarang alah

LANGKAH Tan Sri William Mawan enggau Datuk Joseph Entulu patut dipuji laban ke udah mutus runding nulung BN ba PRU14. 

Taja pin penca-silat seduai, sebedau Kepala Menteri Datuk Patinggi Abang Johari Tun Openg mantaika nama calun BN kena 24 April tu tadi, baka ajat bunuh, ngujungka mayuh urang mikir seduai tetap bediri sigi pin enda dalam lis BN, kebendar seduainya semina ngegap aja. 

Nyema kejaku urang, berani udug, nyalak munyi kenama, tang ke pengamai takut. 

Tang sigi gaya politik, tusah ka dipedalam, lebih agi ba sida ke veteran baka Mawan enggau Entulu. 

Sehari dua sebedau nganjung nama, Tun Mahathir bisi nyebut pasal urang BN ti enda dipilih bediri ka disuruh ia betanding ngena lambang PKR. 

Naka meh sekeda pemerati politik enggau politikus, mikir Mawan ngenan penuduk ia di Saratok, lalu Entulu di Selangau. 

Enti amai bakanya, alah BN-PDP di Saratok, lalu alah mega BN-PRS di Selangau, ku sida. 

Tang datai hari nganjung nama, peda Mawan tak ngiring Subeng Mula. 

Di Selangau, taja Entulu enda dipeda ba tempat nganjung nama Rita Insol, tang ia sempat madahka diri tetap nyukung BN ngagai pemberita. 

Naka meh pengeringat sida pemangkang, laban sida sigi ngarapka veteran dua iku tu, enti enda bediri muak ka sida, sekurang kurang bediri ngena lambang independent lalu mechah undi BN. 

Tang laban ke enda bediri, nyengala amai, peluang BN menang ba dua sitak menoa tu chukup cherah. 

Ba senentang tu, Mawan enggau Entulu patut dipuji laban penyukung seduai ia tetap nunda singkang seduai ti ngering serta negapka BN. 

Enda ibuh meh kitai bekelikuhka kebuah seduai ia enda ngingkas diri ari BN. Ti penting seduai mutus ati netap diri ba BN taja pin enda dipadu nyadi calun sekali tu. 

Urang sigi bisi nganu seduai, sekeda ngumbai seduai takut, sekeda mega ngumbai seduai agi nguna penuduk dalam perintah. 

Peneka nyebut dia meh, tang hal takut enggau berani enda timbul laban seduai ia ari pun sigi urang BN. 

Nyema seduai diberi penuduk ulih perintah BN ketegal seduai taat ka BN, sigi enda salah laban kitai sama nemu, PRU14  siti perang besai, sapa sapa ti nampak bendar tau ngasuh BN menang patut diupah enggau chukup chukup. 

Enda nyamai ka taatka parti dalam keadaan ti tau meri mua malu.  Lebih agi tudah Mawan ke siku mensia ti tusah bendar ngemeran taat setia ka parti. 

Tang paling nyamai meh enti ketuai  BN andal meda Mawan enggau Entulu memasin bisi pemai enggau pengering ngenan kubu BN. 

Dalam perkiraan seduai ia, BN untung, seduai pin tetap nadai pengerugi.