• అంగన్వాడీల పారిశుద్ధ్యంపై నిర్లక్ష్యమెందుకు?
• చిన్నారుల భద్రత స్థానిక సంస్థలదే.. హెల్పర్లపై అదనపు భారం వద్దు: షేక్ సుభహన్

అంగన్వాడీల పారిశుద్ధ్యంపై నిర్లక్ష్యమెందుకు?

చిన్నారుల భద్రత స్థానిక సంస్థలదే.. హెల్పర్లపై అదనపు భారం వద్దు: షేక్ సుభహన్

ఖమ్మం, అక్టోబర్ 27 (పీపుల్స్ వాయిస్): అంగన్వాడీ కేంద్రాల పరిసరాల్లో పేరుకుపోయిన చెత్తాచెదారం, పెరిగిన పిచ్చిమొక్కలను తొలగించి పారిశుద్ధ్య చర్యలు చేపట్టాలని భారత కార్మిక సంఘాల సమాఖ్య (IFTU) ఖమ్మం జిల్లా అధ్యక్షుడు షేక్ సుభహన్ డిమాండ్ చేశారు. అపరిశుభ్ర వాతావరణం వల్ల పాములు, తేళ్లు వంటి విషపురుగులు కేంద్రాల్లోకి ప్రవేశించే ప్రమాదం ఉందని, దీనిని నివారించేందుకు అధికారులు తక్షణ చర్యలు తీసుకోవాలని కోరారు.

కేంద్రాల లోపలి పరిశుభ్రత హెల్పర్ల విధుల్లో భాగమైనప్పటికీ, బయట పరిసరాల్లో చెత్త తొలగింపు, డ్రైనేజీల నిర్వహణ, వీధులు, బహిరంగ ప్రదేశాల శుభ్రత బాధ్యతలను సంబంధిత గ్రామపంచాయతీలు, మున్సిపాలిటీలు నిర్వర్తించాలని స్పష్టం చేశారు. హెల్పర్లపై వారి విధులకు మించి అదనపు పారిశుద్ధ్య పనులను బలవంతంగా మోపడం సరికాదన్నారు.

ఖమ్మం జిల్లాలోని అంగన్వాడీ కేంద్రాల పరిసరాలను పరిశీలించి, క్రమం తప్పకుండా పారిశుద్ధ్య పనులు చేపట్టాలని, ఫిర్యాదులపై వెంటనే స్పందించాలని అధికారులను కోరారు. చిన్నారులకు సురక్షిత వాతావరణం కల్పించడంతో పాటు అంగన్వాడీ టీచర్లు, హెల్పర్లకు గౌరవప్రదమైన పని పరిస్థితులు కల్పించాలని షేక్ సుభహన్ ప్రభుత్వాన్ని డిమాండ్ చేశారు.