• వెలుగుమట్ల భూదాన భూముల బాధితులకు అదే ప్రాంతంలో ఇళ్ల స్థలాలు, ఇందిరమ్మ ఇళ్లు కేటాయించాలని డిమాండ్.
• ప్రభుత్వం స్పందించకపోతే బాధితుల తరఫున భూమిని ఆక్రమించి ఇళ్ల స్థలాలు పంచుతామని గుమ్మడి నరసయ్య హెచ్చరిక.

వెలుగుమట్ల బాధితులకు అక్కడే ఇళ్ల స్థలాలు, ఇందిరమ్మ ఇళ్లు కేటాయించాలి

ప్రభుత్వం తక్షణమే న్యాయం చేయాలి: మాజీ ఎమ్మెల్యే గుమ్మడి నరసయ్య

ఖమ్మం, అక్టోబర్ 27 (పీపుల్స్ వాయిస్):
వెలుగుమట్ల భూదాన భూముల్లో ఇళ్లు కూల్చివేతకు గురైన బాధితులందరికీ, పంచనామా జాబితాలో పేర్లు ఉన్నవారితో పాటు అందులో పేర్లు లేని నిజమైన బాధితులకు సైతం అదే ప్రాంతంలో ఇళ్ల స్థలాలు, ఇందిరమ్మ ఇళ్లు కేటాయించాలని ఇల్లందు మాజీ ఎమ్మెల్యే గుమ్మడి నరసయ్య ప్రభుత్వాన్ని డిమాండ్ చేశారు.

బాధితుల తరఫున ఖమ్మం జిల్లా కలెక్టరేట్‌లో కలెక్టర్‌ను కలిసి వివిధ పత్రాలు సమర్పించిన అనంతరం ఆయన ఈ అంశంపై మాట్లాడారు. పేదల ఇళ్లు కూల్చివేసి ఏడు నెలలు పూర్తయి, ఎనిమిదో నెల కొనసాగుతున్నా సమస్య పరిష్కారం కాలేదని పేర్కొన్నారు. దీంతో బాధిత కుటుంబాలు తీవ్ర ఆందోళనకు గురవుతున్నాయని, ప్రస్తుతం అద్దె ఇళ్లలో ఉంటూ అదనపు ఆర్థిక భారాన్ని మోయాల్సి వస్తోందని తెలిపారు.

ప్రభుత్వం ఇప్పటికే సమస్య పరిష్కారంలో జాప్యం చేసిందని, ఇకనైనా కాలయాపన చేయకుండా బాధితులందరికీ న్యాయం చేయాలని గుమ్మడి నరసయ్య కోరారు. ప్రభుత్వం స్పందించి ఇళ్ల స్థలాలు, ఇందిరమ్మ ఇళ్లు కేటాయించకపోతే బాధితుల తరఫున భూమిని ఆక్రమించి ప్రజలకు ఇళ్ల స్థలాలు పంచుతామని హెచ్చరించారు.

ఈ కార్యక్రమంలో సీపీఐ (ఎంఎల్) మాస్ లైన్ జిల్లా కార్యదర్శివర్గ సభ్యుడు ఆవుల అశోక్, నాయకులు వరగాని కోటేశ్వరరావు, కవిత, వెంకటేశ్వరరావుతో పాటు వెలుగుమట్ల బాధితులు కళ్యాణి, సతీష్, సుమలత, పద్మ, గంగమ్మ, లక్ష్మీ, జయమ్మ, రమాదేవి తదితరులు పాల్గొన్నారు.