• నవంబర్ 05 నుంచి 11 వరకు విద్యార్థి అమరవీరుల వారోత్సవాలు
• అమరవీరుల త్యాగాలను స్మరించుకోవాలని పీడీఎస్‌యూ పిలుపు
• విద్యార్థుల హక్కుల పరిరక్షణకు పోరాటాలు కొనసాగించాలి
• అధిక ఫీజులు, కుల వివక్ష, హాస్టళ్ల సమస్యలపై ఉద్యమాలు
• పెండింగ్ స్కాలర్‌షిప్‌ల విడుదలకు పోరాటం
• వారోత్సవాలను జయప్రదం చేయాలని తిమ్మిడి రఘు విజ్ఞప్తి

అమరవీరుల త్యాగస్ఫూర్తితో విద్యార్థి ఉద్యమాలను బలోపేతం చేద్దాం!
నవంబర్ 05–11 వరకు విద్యార్థి అమరవీరుల వారోత్సవాలు జయప్రదం చేయాలి: తిమ్మిడి రఘు

ఖమ్మం, అక్టోబర్ 30 (పీపుల్స్ వాయిస్):
పీడీఎస్‌యూ రాష్ట్ర కమిటీ పిలుపులో భాగంగా నవంబర్ 05 నుంచి 11 వరకు నిర్వహించనున్న విద్యార్థి అమరవీరుల వారోత్సవాలను జయప్రదం చేయాలని పీడీఎస్‌యూ ఖమ్మం జిల్లా యాక్టింగ్ కార్యదర్శి తిమ్మిడి రఘు పిలుపునిచ్చారు. ఖమ్మం పట్టణంలోని మాస్‌లైన్ కార్యాలయంలో నిర్వహించిన ముఖ్య కార్యకర్తల సమావేశంలో ఆయన మాట్లాడారు.

నక్సల్బరి, శ్రీకాకుళం, గోదావరి లోయ పోరాటాల స్ఫూర్తితో సాగిన విద్యార్థి ఉద్యమంలో జార్జిరెడ్డి, జంపాల చంద్రశేఖర ప్రసాద్, శ్రీపాద శ్రీహరి, కోలా శంకర్, రంగవల్లి, చేరాలు, రమణయ్య, సాంబయ్య తదితరులు ప్రాణత్యాగం చేశారని గుర్తుచేశారు. వారి ఆశయ సాధన కోసం శాస్త్రీయ విద్య, విద్యార్థుల హక్కుల పరిరక్షణకు పోరాటాలు కొనసాగించాలని పిలుపునిచ్చారు.

అధిక ఫీజులు, కుల వివక్ష, మహిళలపై దాడులు, సంక్షేమ హాస్టళ్ల సమస్యలు, పెండింగ్ స్కాలర్‌షిప్‌లు, ఇంజినీరింగ్, యూనివర్సిటీ విద్యార్థుల సమస్యలపై పీడీఎస్‌యూ నిరంతరం పోరాడుతోందని తెలిపారు. పేద, బలహీన వర్గాల విద్యార్థులకు అండగా నిలుస్తూ అమరవీరుల ఆశయాలను ముందుకు తీసుకెళ్తామని పేర్కొన్నారు. ఈ సమావేశంలో జిల్లా అధ్యక్షుడు తిప్పారపు లక్ష్మణ్, నాయకులు స్టాలిన్, కార్తీక్ రెడ్డి, గణేష్, సుమన్, మహేష్ తదితరులు పాల్గొన్నారు.