చిన్న వయసులోనే హైకోర్టు న్యాయవాదిగా ప్రత్యేక గుర్తింపు
క్లిష్టమైన కేసుల్లో సమర్థవంతమైన వాదనలు.. యువ న్యాయవాది పుల్లబొట్ల విఎల్ఎస్ శ్రీ చక్రపాణికి అభినందనలు
రూ.25 వేల సైబర్ వివాదంలో విద్యార్థి బ్యాంకు ఖాతాకు హైకోర్టు ద్వారా ఉపశమనం
ఖమ్మం, నవంబర్ 18 (పీపుల్స్ వాయిస్):
పట్టుదల, అంకితభావం, న్యాయశాస్త్రంపై లోతైన అవగాహన ఉంటే వయసుతో సంబంధం లేకుండా ఉన్నత విజయాలను సాధించవచ్చని యువ హైకోర్టు న్యాయవాది పుల్లబొట్ల విఎల్ఎస్ శ్రీ చక్రపాణి నిరూపిస్తున్నారు. అతి చిన్న వయసులోనే న్యాయవాద వృత్తిలోకి అడుగుపెట్టిన ఆయన, తెలంగాణ హైకోర్టులో పలు కీలకమైన, క్లిష్టమైన కేసుల్లో సమర్థవంతంగా వాదనలు వినిపిస్తూ ప్రత్యేక గుర్తింపు పొందుతున్నారు.
న్యాయవాద వృత్తిలో ప్రతిభకు నిదర్శనం
న్యాయవాద వృత్తిలో అనుభవంతో పాటు చట్టాలపై లోతైన అవగాహన, విశ్లేషణాత్మక ఆలోచన, బలమైన వాదనా పటిమ ఎంతో కీలకం. ఈ లక్షణాలను తన వృత్తిలో ప్రతిబింబిస్తూ పుల్లబొట్ల విఎల్ఎస్ శ్రీ చక్రపాణి సివిల్, క్రిమినల్, రాజ్యాంగపరమైన అంశాలకు సంబంధించిన కేసుల్లో తనదైన శైలిలో వాదనలు వినిపిస్తున్నారు. బాధితులకు న్యాయపరమైన ఉపశమనం కల్పించేందుకు చేస్తున్న కృషి ప్రశంసలు అందుకుంటోంది.
రూ.25 వేల సైబర్ వివాదంలో విద్యార్థికి హైకోర్టు ఉపశమనం
శ్రీ చక్రపాణి న్యాయవాద ప్రతిభను చాటిచెప్పే కేసుల్లో తెలంగాణ హైకోర్టులో దాఖలైన డబ్ల్యూ.పీ. నెం.35403 ఆఫ్ 2026 ఒకటి.
సైబర్ నేరానికి సంబంధించిన దర్యాప్తులో భాగంగా ఒక విద్యార్థికి చెందిన బ్యాంక్ ఆఫ్ మహారాష్ట్ర ఖాతా నిలిపివేయబడింది. అనుమానాస్పద లావాదేవీ ద్వారా ఆ ఖాతాలో రూ.25,000 జమ కావడంతో దర్యాప్తు సంస్థల సూచన మేరకు మొత్తం బ్యాంకు ఖాతాను స్తంభింపజేశారు. దీంతో విద్యార్థి తన ఇతర చట్టబద్ధమైన ఆర్థిక లావాదేవీలను నిర్వహించలేని పరిస్థితి ఏర్పడింది.
ఈ నేపథ్యంలో పిటిషనర్ తరఫున వాదనలు వినిపించిన అడ్వకేట్ పుల్లబొట్ల విఎల్ఎస్ శ్రీ చక్రపాణి, వివాదాస్పదమైన రూ.25,000 మొత్తాన్ని మాత్రమే నిలుపుదల చేసి, మిగిలిన ఖాతా కార్యకలాపాలను కొనసాగించేందుకు అనుమతించాలని హైకోర్టు దృష్టికి తీసుకెళ్లారు.
తన వాదనలకు మద్దతుగా మద్రాస్, కేరళ, తెలంగాణ హైకోర్టులు వెలువరించిన ఐదు న్యాయపూర్వ తీర్పులను ఆధారాలుగా సమర్పించారు. దర్యాప్తు ప్రయోజనాలను కాపాడుతూనే వ్యక్తుల చట్టబద్ధమైన ఆర్థిక హక్కులను పరిరక్షించాల్సిన అవసరాన్ని వివరించారు.
ఈ వాదనలను పరిశీలించిన హైకోర్టు, వివాదాస్పదమైన రూ.25,000 మొత్తంపై లియన్ కొనసాగిస్తూ, మిగిలిన లావాదేవీల కోసం బ్యాంకు ఖాతాను తిరిగి వినియోగించుకునేందుకు అనుమతించాలని సంబంధిత బ్యాంకును ఆదేశించింది. దీంతో బాధిత విద్యార్థికి గణనీయమైన ఉపశమనం లభించింది.
సుప్రీంకోర్టు స్థాయి న్యాయపరమైన అనుభవం
శ్రీ చక్రపాణి న్యాయవాద ప్రయాణంలో సుప్రీంకోర్టు అనుభవం కూడా కీలకంగా నిలిచింది. భారత మాజీ ప్రధాన న్యాయమూర్తి జస్టిస్ ఎన్.వి.రమణ కార్యాలయంలో ఇంటర్న్గా పనిచేసిన సమయంలో అడ్మిషన్ అంశాలపై సంక్షిప్త నోట్లు సిద్ధం చేయడం, బెయిల్ అంశాలు, ట్రాన్స్ఫర్ పిటిషన్లు, మధ్యవర్తిత్వ చట్టానికి సంబంధించిన నిబంధనలపై పరిశోధన చేయడం వంటి బాధ్యతలను నిర్వహించారు.అలాగే సుప్రీంకోర్టు మాజీ న్యాయమూర్తి జస్టిస్ జాస్తి చలమేశ్వర్ వద్ద కూడా ఇంటర్న్షిప్ ద్వారా న్యాయస్థాన కార్యకలాపాలపై విలువైన అనుభవాన్ని పొందారు.అనంతరం అడ్వకేట్ ఎం.కె. జలీల్ వద్ద న్యాయవాద వృత్తికి సంబంధించిన అనుభవాన్ని పెంపొందించుకున్నారు. గురుగ్రామ్లోని ఏస్ & ఏ లా ఆఫీసెస్ సంస్థలో డిస్ప్యూట్ రిజల్యూషన్ విభాగంలో అసోసియేట్గా పనిచేశారు. ఈ అనుభవాలు న్యాయపరమైన పరిశోధన, వివాద పరిష్కారం, కేసుల విశ్లేషణ, వ్యూహరచనలో ఆయనకు ప్రాయోగిక అవగాహనను అందించాయి.
యువతకు ఆదర్శంగా న్యాయవాది
చిన్న వయసులోనే న్యాయవాద వృత్తిలో ప్రత్యేక గుర్తింపు సాధిస్తూ ముందుకు సాగుతున్న పుల్లబొట్ల విఎల్ఎస్ శ్రీ చక్రపాణి ప్రయాణం యువతకు స్ఫూర్తిదాయకంగా నిలుస్తోంది. న్యాయరంగంలో మరిన్ని విజయాలు సాధిస్తూ ఉన్నత శిఖరాలను అధిరోహించాలని తోటి న్యాయవాదులు, శ్రేయోభిలాషులు ఆకాంక్షిస్తున్నారు.