పీడీఎస్‌యూలోకి పలువురి చేరికలు

పీడీఎస్‌యూలోకి పలువురి చేరికలు

వెంకటేష్ వంగూరితో పాటు పలువురు నాయకులు, కార్యకర్తలు పీడీఎస్‌యూలో చేరిక

ఖమ్మం, అక్టోబర్ 27 (పీపుల్స్ వాయిస్):
 ప్రగతిశీల ప్రజాస్వామ్య విద్యార్థి సంఘం (PDSU) ఖమ్మం జిల్లా కమిటీ ఆధ్వర్యంలో లెనిన్ నగర్‌లోని న్యూడెమోక్రసీ పార్టీ జిల్లా కార్యాలయంలో చేరికల కార్యక్రమం నిర్వహించారు. ఇటీవల మాస్ లైన్ పీడీఎస్‌యూకు రాజీనామా చేసిన వెంకటేష్ వంగూరితో పాటు పలువురు నాయకులు, కార్యకర్తలు తిరిగి మాతృసంస్థ పీడీఎస్‌యూలో చేరారు. ఈ సందర్భంగా పీడీఎస్‌యూ రాష్ట్ర అధ్యక్షుడు పి. మహేష్, రాష్ట్ర ప్రధాన కార్యదర్శి పొడపంగి నాగరాజు వారికి కండువాలు కప్పి ఆహ్వానించారు.

ఈ సందర్భంగా నాయకులు మాట్లాడుతూ, విద్యార్థి ఉద్యమంలో ఏర్పడిన చీలికలను అధిగమించి విప్లవ విద్యార్థి సంఘాలు ఐక్యంగా పనిచేయాల్సిన అవసరం ఉందన్నారు. భావసారూప్యత కలిగిన సంఘాలను ఏకం చేసి బలమైన విద్యార్థి ఉద్యమాన్ని నిర్మించేందుకు కృషి చేస్తామని తెలిపారు.

కేంద్ర ప్రభుత్వం తీసుకొచ్చిన నూతన జాతీయ విద్యా విధానం–2020 వల్ల పేద, బడుగు, బలహీన వర్గాల విద్యార్థులకు ఉన్నత విద్య అందుబాటులో లేకుండా పోతోందని వారు విమర్శించారు. విద్యార్థుల హక్కులు, ప్రజాస్వామ్య హక్కుల పరిరక్షణకు ఐక్యంగా పోరాడాలని పిలుపునిచ్చారు.

తెలంగాణలో విద్యారంగ సమస్యలు ఇంకా పరిష్కారం కాలేదని పేర్కొంటూ, పెండింగ్‌లో ఉన్న ఫీజు రీయింబర్స్‌మెంట్, స్కాలర్‌షిప్‌లను వెంటనే విడుదల చేయాలని డిమాండ్ చేశారు. ప్రభుత్వ విద్యాసంస్థలను బలోపేతం చేయాలని, ఖాళీగా ఉన్న బోధన, బోధనేతర పోస్టులను భర్తీ చేయాలని, ప్రభుత్వ విద్యారంగానికి తగిన నిధులు కేటాయించాలని కోరారు.

ఖమ్మం జిల్లాలో బలమైన విద్యార్థి ఉద్యమ నిర్మాణానికి ఈ చేరికలు దోహదపడతాయని నాయకులు ఆశాభావం వ్యక్తం చేశారు. విద్యార్థుల విద్యా హక్కులు, సామాజిక న్యాయం, ప్రభుత్వ విద్యారంగ పరిరక్షణ కోసం పోరాటాలు కొనసాగిస్తామని తెలిపారు.

ఇది కూడా చదవండి :: ఎల్‌నినో ప్రభావాలపై అప్రమత్తం.. నీటి పొదుపు, ఆరుతడి పంటల సాగుపై వందనం గ్రామసభ