తిమ్మినేనిపాలెంలో ట్రాక్టర్‌ ట్రైలర్‌ బోల్తా.. ఆరుగురికి తీవ్ర గాయాలు

తిమ్మినేనిపాలెంలో ట్రాక్టర్‌ ట్రైలర్‌ బోల్తా.. ఆరుగురికి తీవ్ర గాయాలు

చింతకాని, అక్టోబర్ 26 (పీపుల్స్ వాయిస్):

 చింతకాని మండలం తిమ్మినేనిపాలెం గ్రామంలో సోమవారం మధ్యాహ్నం జరిగిన రోడ్డు ప్రమాదంలో 23 మంది మహిళా వ్యవసాయ కూలీలు గాయపడ్డారు. వీరిలో ఆరుగురికి తీవ్ర గాయాలయ్యాయి.

పోలీసులకు అందిన ఫిర్యాదు ప్రకారం.. తిమ్మినేనిపాలెం గ్రామానికి చెందిన కవితతో పాటు మరో 22 మంది మహిళలు నాగులవంచ గ్రామంలో పత్తి ఏరే పనికి వెళ్లారు. పని ముగించుకుని ట్రాక్టర్‌ ట్రైలర్‌లో స్వగ్రామానికి తిరిగి వస్తుండగా మధ్యాహ్నం 3.50 గంటల సమయంలో ఈ ప్రమాదం జరిగింది. ట్రాక్టర్‌ను నడుపుతున్న నాగులవంచ గ్రామానికి చెందిన అంబటి శ్రీనివాసరావు అజాగ్రత్తగా, నిర్లక్ష్యంగా, అధిక వేగంతో నడపడంతో వాహనంపై నియంత్రణ కోల్పోయి ట్రాక్టర్‌, ట్రైలర్‌ బోల్తాపడినట్లు ఫిర్యాదులో పేర్కొన్నారు.

ఈ ప్రమాదంలో ట్రైలర్‌లో ప్రయాణిస్తున్న మహిళా కూలీలు కిందపడిపోగా, కవిత, కొమ్ము నిర్మల, నాదెండ్ల భారతమ్మ, తుడుం మరియమ్మ, నాదెండ్ల రామదేవి, నాదెండ్ల వెంకనమ్మ తీవ్రంగా గాయపడ్డారు. మిగిలిన వారికి స్వల్ప గాయాలయ్యాయి.

కవిత భర్త మర్రి జ్ఞానేష్‌ ఇచ్చిన ఫిర్యాదు మేరకు ట్రాక్టర్‌ డ్రైవర్‌పై చట్టపరమైన చర్యలు తీసుకోవాలని పోలీసులు కోరినట్లు తెలిపారు.

ఇది కూడా చదవండి :: వందనం గ్రామ ప్రజల చిరకాల ఆకాంక్ష నెరవేర్పునకు ముందడుగు.. బీటీ రోడ్డు పనులు ప్రారంభం