డీజే సౌండ్ తగ్గించమన్నందుకు తెలంగాణ ఉద్యమకారుడిపై దాడి!

డీజే సౌండ్ తగ్గించమన్నందుకు తెలంగాణ ఉద్యమకారుడిపై దాడి!

ముఠాపురంలో చావా రమేష్‌పై పదిమంది యువకులు కర్రలతో దాడి చేశారని ఫిర్యాదు

నేలకొండపల్లి, అక్టోబర్ 22 (పీపుల్స్ వాయిస్): డీజే సౌండ్ తగ్గించాలని కోరినందుకు తెలంగాణ ఉద్యమకారుడు చావా రమేష్‌పై కొందరు యువకులు కర్రలతో దాడి చేసినట్లు ఆరోపణలు వెలువడ్డాయి. ఖమ్మం జిల్లా నేలకొండపల్లి మండలం ముఠాపురంలో చోటుచేసుకున్న ఈ ఘటనపై బాధితుడు నేలకొండపల్లి పోలీస్‌స్టేషన్‌లో ఫిర్యాదు చేసినట్లు తెలిసింది.

ముఠాపురానికి చెందిన చావా రమేష్ కుటుంబ సభ్యులు అనారోగ్యంతో బాధపడుతుండటంతో డీజే సౌండ్ తగ్గించాలని కోరినట్లు సమాచారం. దీంతో ఆగ్రహించిన సుమారు పది మంది యువకులు తనపై కర్రలతో దాడికి పాల్పడ్డారని ఆయన ఫిర్యాదులో పేర్కొన్నట్లు తెలిసింది. ఈ ఘటనపై పోలీసులు విచారణ జరిపి బాధ్యులపై చర్యలు తీసుకోవాలని స్థానికులు కోరుతున్నారు.

డీజే శబ్ద కాలుష్యంపై ఆందోళన

నేలకొండపల్లి మండలంలో డీజే శబ్దాల వినియోగంపై వివాదాలు తలెత్తుతున్నాయనే ఆందోళనలు వ్యక్తమవుతున్నాయి. చెర్వు మాదారంలో రెండు రోజుల క్రితం డీజే శబ్దాల కారణంగా ఓ మహిళ మృతి చెందినట్లు ప్రచారం జరుగుతున్నప్పటికీ, ఈ ఘటనకు సంబంధించిన కారణాలు అధికారికంగా ధ్రువీకరించాల్సి ఉంది.

ఇదిలా ఉండగా, దసరా సందర్భంగా రెండు వర్గాల మధ్య డీజే వినియోగం వివాదానికి దారితీసినట్లు సమాచారం. డీజేలకు అనుమతులు, శబ్ద పరిమితులపై పోలీసు శాఖ నిబంధనలు అమలు చేయాలని స్థానికులు కోరుతున్నారు. ముఠాపురంలో దుర్గామాత నిమజ్జనం సందర్భంగా డీజేలు వినియోగించడంతో ప్రజలు ఇబ్బందులు ఎదుర్కొన్నారని ఆరోపణలు ఉన్నాయి.

ప్రశ్నిస్తే దాడులా?

డీజే శబ్దాల వల్ల అనారోగ్యంతో ఉన్నవారు, వృద్ధులు, చిన్నపిల్లలు ఇబ్బందులు పడుతున్నారని స్థానికులు ఆందోళన వ్యక్తం చేస్తున్నారు. శబ్దాన్ని తగ్గించాలని కోరిన వారిపై దాడులకు పాల్పడితే సహించరాదని, ఇలాంటి ఘటనలు పునరావృతం కాకుండా పోలీసులు కఠిన చర్యలు తీసుకోవాలని కోరుతున్నారు.

ముఠాపురం ఘటనపై పోలీసుల అధికారిక స్పందన, దర్యాప్తు వివరాలు తెలియాల్సి ఉంది.

ఇదీ చదవండి :: మూగజీవాల ప్రేమికుడు కనకం మైసయ్య కన్నుమూత