తెలంగాణను కరువు రాష్ట్రంగా ప్రకటించాలి! : కూనంనేని

తెలంగాణను కరువు రాష్ట్రంగా ప్రకటించాలి!.. రైతులను ఆదుకోవడంలో ప్రభుత్వాలు విఫలం కావొద్దు!

రూ.25 వేల కోట్ల కరువు నిధులు విడుదల చేయాలి: కూనంనేని

ఖమ్మం, నవంబర్ 03 (పీపుల్స్ వాయిస్):

తెలంగాణ రాష్ట్రాన్ని కరువు రాష్ట్రంగా ప్రకటించి తక్షణమే కరువు నివారణ చర్యలు చేపట్టాలని సీపీఐ రాష్ట్ర కార్యదర్శి, కొత్తగూడెం ఎమ్మెల్యే కూనంనేని సాంబశివరావు కేంద్ర, రాష్ట్ర ప్రభుత్వాలను డిమాండ్ చేశారు. కేవలం ప్రకటనలకే పరిమితం కాకుండా కరువు నివారణకు అవసరమైన నిధులను వెంటనే విడుదల చేసి రైతులను ఆదుకోవాలని కోరారు.మంగళవారం ఖమ్మం జిల్లాలోని కొణిజర్ల మండల పరిధిలో తనికెళ్ల, కొణిజర్ల తదితర కరువు ప్రభావిత ప్రాంతాల్లో కూనంనేని సాంబశివరావు నేతృత్వంలోని సీపీఐ బృందం పర్యటించింది. సాగుకు నోచుకోని బీడు భూములు, నీరు లేని చెరువులు, అధిక ఉష్ణోగ్రతల కారణంగా దెబ్బతిన్న పంట పొలాలను పరిశీలించారు. పలు ప్రాంతాల్లో అడుగంటిన భూగర్భ జలాల పరిస్థితిని తెలుసుకున్నారు. రైతులతో మాట్లాడి వర్షాభావ పరిస్థితులు, పంటల సాగు, దిగుబడులపై వివరాలు సేకరించారు.అనంతరం తనికెళ్లలో ఏర్పాటు చేసిన మీడియా సమావేశంలో కూనంనేని మాట్లాడుతూ.. కరువు నివారణ చర్యల కోసం కేంద్ర ప్రభుత్వం తక్షణమే రూ.25 వేల కోట్ల నిధులు విడుదల చేయాలని డిమాండ్ చేశారు. కేంద్రం నుంచి నిధులు వచ్చే వరకు రాష్ట్ర ప్రభుత్వం తనవంతుగా నిధులు కేటాయించి కరువు పనులు చేపట్టాలన్నారు. కరువు పరిస్థితులపై పరస్పర రాజకీయ ఆరోపణలు చేసుకోవడం మానుకొని సమన్వయంతో సహాయక చర్యలు చేపట్టాలని సూచించారు. ప్రకృతి విపత్తు వల్ల ఏర్పడిన పరిస్థితులను అధిగమించేందుకు అన్ని రాజకీయ పార్టీలు రాజకీయాలకు అతీతంగా కృషి చేయాలని పిలుపునిచ్చారు.ఎల్‌నినో ప్రభావంతో రాష్ట్రంలో లోటు వర్షపాతం నమోదైందని, చెరువులు, కుంటల్లోకి నీరు చేరకపోవడంతో రైతులు పంటలు సాగు చేయలేని పరిస్థితి ఏర్పడిందని తెలిపారు. ఫలితంగా సాగు విస్తీర్ణం గణనీయంగా తగ్గిందన్నారు. గత ఏడాది ఖరీఫ్‌లో 69.19 లక్షల ఎకరాల్లో వరి సాగు కాగా, ఈ ఏడాది కేవలం 57.04 లక్షల ఎకరాల్లో మాత్రమే సాగు చేశారని వివరించారు. గత ఏడాదితో పోలిస్తే వరి సాగు విస్తీర్ణం 12.15 లక్షల ఎకరాలు తగ్గిందని, సాగు చేసిన పంటల్లోనూ పలుచోట్ల దిగుబడులు తగ్గుతున్నాయని ఆవేదన వ్యక్తం చేశారు. పంటలు సాగు చేయలేకపోయిన రైతులను కూడా ప్రభుత్వం ఆదుకోవాలని కోరారు.రాష్ట్ర ప్రభుత్వం ప్రత్యేక బృందాలను ఏర్పాటు చేసి కరువు పీడిత గ్రామాల్లో క్షేత్రస్థాయి పరిశీలనలు నిర్వహించాలని, పంట నష్టపరిహారం అందించేందుకు తక్షణ చర్యలు చేపట్టాలని డిమాండ్ చేశారు. రైతుల రుణాలను రీషెడ్యూల్ చేయడంతో పాటు, ఇప్పటికే ప్రకటించిన రూ.2 లక్షల రుణమాఫీ అందని రైతుల రుణాలను వెంటనే మాఫీ చేయాలని కోరారు.రానున్న రోజుల్లో తాగునీటి ఎద్దడి ఏర్పడే ప్రమాదం ఉందని, ముందస్తు చర్యలు చేపట్టి ప్రజలకు తాగునీటి ఇబ్బందులు లేకుండా చూడాలన్నారు. గ్రామ పంచాయతీలకు ప్రత్యేక కరువు నిధులు కేటాయించాలని, వీబీ-జీ రామ్‌జీ పథకం ద్వారా ఉపాధి పనులు విస్తృతంగా చేపట్టి పని దినాల సంఖ్య పెంచాలని సూచించారు. కూలీలకు గిట్టుబాటు అయ్యే వేతనాలు అందించాలని, పశుగ్రాసం కొరత ఏర్పడకుండా చర్యలు తీసుకోవాలని కోరారు. చిన్న, సన్నకారు రైతులకు ప్రయోజనం చేకూరేలా ఉపాధి పనులు చేపట్టాలని, ముఖ్యంగా కౌలు రైతుల కోసం ప్రత్యేక కార్యాచరణ రూపొందించాలని అన్నారు. వరి పంటకు ఎకరాకు రూ.30 వేలు, వాణిజ్య పంటలకు ఎకరాకు రూ.50 వేల చొప్పున నష్టపరిహారం అందించాలని డిమాండ్ చేశారు.మరోవైపు నిత్యావసర వస్తువులను బ్లాక్ మార్కెట్‌కు తరలిస్తూ కృత్రిమ కొరత సృష్టించి ప్రజలపై భారాలు మోపుతున్న వారిపై కఠిన చర్యలు తీసుకోవాలని కోరారు. 14 రకాల నిత్యావసర వస్తువులను చౌక ధరల దుకాణాల ద్వారా ప్రజలకు సరఫరా చేయాలని సూచించారు. ప్రస్తుతం సాగులో ఉన్న పంటలను కాపాడేందుకు రైతులకు నిరంతరాయంగా విద్యుత్ సరఫరా చేయాలని ప్రభుత్వాన్ని డిమాండ్ చేశారు.ఈ మీడియా సమావేశంలో రాష్ట్ర రైతు సంఘం అధ్యక్షుడు బాగం హేమంతరావు, సీపీఐ జిల్లా సహాయ కార్యదర్శి జమ్ముల జితేందర్ రెడ్డి, సీపీఐ రాష్ట్ర సమితి సభ్యుడు యర్రా బాబు, జిల్లా రైతు సంఘం అధ్యక్షుడు దొండపాటి రమేష్, రైతు సంఘం నాయకులు రవీంద్రబాబు, మిడికంటి వెంకటరెడ్డి, తోట రామాంజనేయులు, మండల కార్యదర్శి గడల భాస్కర్ తదితరులు పాల్గొన్నారు.

ఇది కూడా చదవండి :: జర్నలిస్టుల సహనాన్ని పరీక్షించొద్దు.18ఏళ్ల సమస్యకు వెంటనే పరిష్కారం చూపండి!మామిడి సోమయ్య డిమాండ్